சின்னக் கண்ணன் அழைக்கிறான்...

முன்னே ஒரு முறை இதே போல் கண்ணன் மேல் ஒரு காவடிச் சிந்து எழுதியிருக்கேன். இன்னொண்ணு எழுத திடீர்னு ஆசை வந்தது. தப்பில்லை தானே? இந்த பாடலை யாரேனும் பாடித் தந்தால் மகிழ்வோம் (கண்ணனும் நானும் :)

துள்ளித் துள்ளி வரும் கண்ணன்
தனை அள்ளி அள்ளிக் கொஞ்ச எண்ணும் - எந்தன்
கண்ணா மணி வண்ணா மலர் மன்னா கார் வண்ணா இங்கு
வாடா முன்னால் வாடா - கட்டி
முத்தம் ஒன்று தாடா!

ஓடி வரும் சின்னக் கண்ணன்
தனை நாடிச் செல்லும் நெஞ்சம் கொஞ்ச - செல்லக்
கண்ணன் அவன் கெஞ்சக் கெஞ்சக் கொஞ்சிக் கொஞ்சிக் கொஞ்சம் மிஞ்சி
மறைவான் ஓடி ஒளிவான் - பின்னர்
வருவான் இன்பம் தருவான்!

ஆரங்கள் மார்பினில் அசைய
மயிற் பீலியும் அதனுடன் இசைய - வண்ணக்
கண்ணன் அவன் மண்ணைத் தின்று அன்னை அவள் கண்ணீர் விட
சிரிப்பான் சீண்டிக் களிப்பான் - வாய்
திறப்பான் உள்ளம் நிறைப்பான்!

கன்னக் குழி தன்னில் வீழும்
மனம் கண்ணன் எழில் தன்னில் ஆழும் - அந்தப்
பொல்லாதவன் புல்லாங்குழல் துளை தன்னிலே இதழ் சேரவே
மலரும் நெஞ்சம் குளிரும் - உயிர்
உருகும் கண்கள் பெருகும்!

--கவிநயா